WhatsApp-ல் இமேஜ் டூ ஸ்டிக்கர் கன்வெர்ட்டர் அம்சம்; இனி Third-Party ஆப் தேவையில்ல!

 பேஸ்புக்கிற்குச் சொந்தமான இன்ஸ்டன்ட் மெசேஜிங் தளமான வாட்ஸ்அப், புகைப்படங்களை ஸ்டிக்கர்களாக மாற்றும் ஒரு புதிய அம்சத்தில் செயல்படுவதாக கூறப்படுகிறது.

வாட்ஸ்அப்பின் புதிய மற்றும் வரவிருக்கும் அம்சங்களைக் கண்காணிக்கும் ஆன்லைன் தளமான WaBetaInfo வழியாக கிடைத்த தகவலின்படி, இந்த அம்சம் எந்தவொரு மூன்றாம் தரப்பு பயன்பாட்டையும் பயன்படுத்தாமலேயே ஒரு புகைப்படத்திலிருந்து ஸ்டிக்கரை விரைவாக உருவாக்க உதவும்.


இந்த புதிய அம்சம் எப்படி வேலை செய்யும்?

வெளியான அறிக்கையின்படி, வாட்ஸ்அப் அதன் கேப்ஷன் பாருக்கு (Caption Bar) அடுத்ததாக ஒரு புதிய ஸ்டிக்கர் ஐகானைச் சேர்க்கும். ஒரு பயனர் அதைத் தேர்ந்தெடுக்கும்போது, ஒரு புகைப்படம் ஸ்டிக்கராக அனுப்பப்படும்.

இந்த அம்சம் எப்படி இருக்கும் என்பதற்கான ஸ்கிரீன் ஷாட்டையும் WaBetaInfo பகிர்ந்துள்ளது. உடன் ஒரு ஸ்டிக்கரை அனுப்பிய பிறகு, குறிப்பிட்ட படம் ஸ்டிக்கராக அனுப்பப்பட்டதா என்பதை பயனர்களால் சரிபார்க்க முடியும் என்றும் WaBetaInfo கூறுகிறது.

தற்போதைக்கு ஒரு வாட்ஸ்அப் பயனரால் புகைப்படங்களை ஸ்டிக்கர்களாக மாற்ற முடியுமா?

இப்போது வரை, வாட்ஸ்அப் அதன் பயனர்களுக்கு கஸ்டம் ஸ்டிக்கர்களை உருவாக்க மட்டுமே அனுமதிக்கிறது. ஆனால் இந்த ஆதரவு ஆண்ட்ராய்டு பயனர்களுக்கு மட்டுமே கிடைக்கும்.

இருப்பினும் இது ஒப்பீட்டளவில் மிகவும் நீளமான செயல்முறையாகும், ஏனெனில் ஒருவர் மூன்றாம் தரப்பு பயன்பாட்டைப் பயன்படுத்தி முதலில் படத்தின் பின்னணியை "அழிக்க" வேண்டும். மேலும், வாட்ஸ்அப் தற்போது வரை PNG ஃபைல்களை மட்டுமே ஸ்டிக்கர்களாக ஆதரிக்கிறது.

இதே போன்ற செயல்முறை தான் வரவிருக்கும் புதிய அம்சத்திலும் இருக்குமா?

இருக்காது! வெளியான அறிக்கையின்படி, வாட்ஸ்அப் ஒரு அதன் பிளாட்பார்மில் குறிப்பிட்ட டூலை (tool) அறிமுகம் செய்த பின்னர்அது படங்களை ஸ்டிக்கர்களாக மாற்ற விரைவான மற்றும் எளிதான செயல்முறைகளை வழங்கும்.

இந்த புதிய அம்சம் எப்போது வரும்?

தற்போது வரை இந்த அம்சம் வளர்ச்சியில் தான் உள்ளது. இது எதிர்கால பீட்டா அப்டேட்டில் அணுக கிடைக்கலாம் என்று கூறப்படுகிறது.

யாருக்கு முதலில் கிடைக்கும்?

சுவாரசியமான விடயம் என்னவென்றால், வாட்ஸ்அப், அதன் ஆண்ட்ராய்டு மற்றும் ஐஓஎஸ் என இரண்டு தளங்களுக்கான பீட்டாவிலும் குறிப்பிட்ட புதிய அம்சத்தின் கீழ் வேலை செய்யவில்லை. அதாவது புகைப்படங்களை ஸ்டிக்கர்களாக மாற்றும் வாட்ஸ்அப் அம்சம் இரண்டு ஓஎஸ் பயனர்களுக்கு அணுக கிடைக்கும்.